14 Oct 2017

Lundi noir du 2 Octobre 2017 kir

Amajambo atyoza , yo gutoneka , kubabaza ku mutima , amajambo yuzuye amacakubiri n’urwanko , yo guteranya abantu , yo kubakurako ubuntu , ukabagereranya n’ibikoko ngo ni imbwa , ba mujeri , ibikoko biryana , ba mayibobo n’ibindi n’ibindi . Ngayo amajambo abategetsi b’Uburundi n’ababashigikiye bahisemwo gukoresha mu nvugo , mu nyandiko no muri bwa buhinga ngurukanabumenyi. Ntawe basonera , ntawe bagera umutwe , eka uwo wese ahirahiriye akadoma ko urutoke amabi akorerwa mu Burundi . Gukoresha majambo aryana umutima cacitse ikigwanisho gikomeye co kunumya , kugabisha no kwica mu gacerere kuko atawubahuka kuryogora . Indero y’uruphasoni twarazwe na ba Sokuru , aho wayibonye , iriko iragenda akagirire .
Umuhari w’abakenyezi n’abigeme baharanira amahoro n’umutekano mu Burundi uvuga uti : Kahise karatwigisha . Invugo y’urwanko n’amacakubiri iba ifise Intumbero . Kwica , guhohotera mu buryo bwose bushoboka uwo wese bakweretse ko mutari bamwe , bica bicika ibisanzwe , uwakoze ivyo vyaha nawe akaba umuhizi , aho guhanwa agashimirwa . Ngaho aho abategetsi b’Uburundi batugejeje . Ariko ntitwoba tubeshe tuvuze tuti benshi murabibona , mugahitamwo kwinumira , mukibera ba ntirunveko , mu gihe uruphu rutaradodora iwanyu . Kagatinda kakaba akamenyero ka tubibayemwo uko nyene. Ejo tuzosanga twabaye igihugu c’inyamaswa , tutakigira akaranga tube dutaye akabanga. Dusigare dukorwa n’isoni ataco tucambariye , atawukigira impuhwe za mugenziwe kuko n’uwugize impuhwe ubu arabizira.

Turateye akamo abarundi n’abarundikazi bose ngo:

  1. Biyamirize iyo nvugo y’urwanko n’amacakubiri , y’ububeshi , abo bayikoresha mubamirire kure
  2. Bibuke ko twese dutegerezwa guharanira kahise keza k’Uburundi , atari akavugwa n’abashaka kwisugura ku vyaha bakora ariko kahise twarazwe n’abakurambere babungabunze uburundi bakabuturaga twese batavanguye , kahise ko kubabaranwa n’uwubabaye , ukaba umuzimyamuriro w’inzu y’umubanyi , kahise kitwereka ko igihugu cacu ari ciza mu gihe tukirwaniye twese kumwe , turi hamwe , tuvuga invugo imwe , ikibi tukacita ikibi , iciza tukacita ikibi . Muntu wagize ubwicanyi ubuhizi , ibuka wa mwibutsa ubuza umwana kwica umuserebanyi kuko nyina yoca acika amabere . Ng’iryo isoko abakuru n’abato twari dukwiye gusubirako . Nayo ibitutsi nk’ivyabungere , guhamagarira abantu kwicana , kwihora , guta ibanga ? Oya. Ubwo n’Ubumara , uburozi bubi kuri kazoza k’abana bacu . Uburundi Bwacu, buduhamagarira twese kubusubiza akaranga kabwo K’ubuntu n’ubuphasoni.
    Ako n’akamo mutewe n’umuhari w’abakenyezi n’abigeme baharanira amahoro n’umutekano mu Burundi .

Leave a Reply

Your email address will not be published. Required fields are marked *